NKorea-in a vawi khatna atan Covid-19 hri a len thu a puang

North Korea chuan nimin khan official-in a ṭum khatna atan an ramah Covid-19 hri a leng tih a puang a, ram pumah inkharkhipna kalpui a ni dawn tih a puang nghal bawk.

Official KCNA news agency chuan Covid-19 hri inkaichhawn awl tak, Omicron sub-variant kai chu an ram khawpui, Pyongyang-ah hmuh a nih thu a sawi a, mahse hri kai zat leh, hri an kai theihna tur awm a sawilang lo. Heng mite sample hi May 8 khan lak a ni tih chauh a tarlang.

"Kum 2020, February thla aṭanga kum hnih leh thla thum chhung hri laka him taka kan awm hnuah kan invenhimna chu chhut chahin a awm ta a ni," tiin official KCNA news agency chuan a sawi.

North Korea hotu Kim Jong Un chuan Workers Party meeting kaihhruaiin, coronavirus hri leng hmachhawn dan turte a sawipui nghal tih report chuan a tarlang bawk.

Kim chuan khawpui leh county zawng zawngte chu hri leng darh zel tur venna atan inkharkhipna khauh tak kengkawh nghal turin thupek a tichhuak a,damdawi pawh semchhuah tura ruahman a ni bawk a ni.

Covid-19 hri hmuh chhuah a nih hnuah NorthKorea hian an ramah hri kai an la awm loh thu hi a sawi reng a, mahse South Korea leh US official-te chuan hei hi a ring lo thung. An ṭhenawm, South Korea leh China-ah Omicron variant nasa taka a darh avangin NKorea pawh a him bik an ring lo a, mahse NKorea hian a hma zawngin official-in hri kai an awm thu a la sawichhuak ngai lo. Covax global Covid-19 vaccine sharing programme leh China aṭanga Covid vaccine pek tum pawh a lo hnar zel a ni.

Kim chuan Workers' Party meeting-ah hian emergency quarantine system thar ber hmangin coronavirus darh tur ven a nih dawn thu te, hun rei loteah hri darhna chhan chhui chhuah a, hri kaite pawh enkawl dam an nih thuai tur thu a sawi.