Sri Lanka court-in PM hlui Rajapaksa zin chhuah a khap

Sri Lanka court chuan nimin khan an ram prime minister hlui Mahinda Rajapaksa, a fapa Namal Rajapaksa leh a thawhpui dang 15-te chu ram pawn lama zin chhuah a khap.

Ram chhunga sum leh pai dinhmun tlakchhiat avanga Thawhṭannia sorkar laka lungawi lohna lantir mipuite beih an nih chungchang chu chhui mek a nih vangin, Fort Magistrate Court chuan PM hlui leh a thawhpuite hi an ram an chhuahsan hi a khap a ni. Zin chhuah khap zingah hian Parliament member - Johnston Fernando, Pavithra Wanniarachchi, Sanjeewa Edirimanne, Kanchana Jayaratne, Rohitha Abeygunawardena, C. B. Ratnayake, Sampath Athukorala, Renuka Perera, Sanath Nishantha, Senior DIG Deshabandu Thennakoon te pawh an tel.

Thawhṭannia nawrh huaihawtte leh police-te inkara buaina chhuakah civil mi an thih hnuah, Rajapaksa hian PM a nihna aṭanga banna a thehlut a ni. President Gotabaya Rajapaksa chuan tun kar chhungin Prime Minister leh cabinet member turte ruat tum a nih thu a sawi a, " Rajapaksa chhungkaw tel lohna cabinet member ṭhalai tak takte ka ruat thar dawn a ni," a ti. Prime Minister thar kaihhruai sorkar chuan an ram tan programme thar siamin, hma lam panin a penpui dawn a ni, tiin political party hrang hrangte chuan an ram buaina tipunlun zawnga che lo turin a ngen zui bawk.