Hong Kong cardinal Joseph Zen an man

Catholic Church senior member zinga mi challang tak, kum 90 mi, Cardinal Joseph Zen chu China national security law bawhchhiaa puhin man a nih thu police-ten an sawi.

Cardinal Joseph leh midang pathumte chu Hong Kong sorkar laka lungawi lohna lantirtute pawisa faia ṭanpui ṭhin, organisation tihtawp tawh pakhat nen inkungkaihna neia puhin an man a ni. An man dangte hi Cantopop singer leh actor Denise Ho, ex-legislator Margaret Ng, leh academic Dr Hui Po Keung-te an ni. An pali hian hian ram dangte thawhpuiah puh a ni a, thiam loh chantir an nih chuan dam chhung tang tura hrem theih an ni ang.

Human Rights Watch chuan thuchhuah siam nghalin, "Cardinal kum 90 mi, boruak muanawm tak hnuaia hma la ṭhin man a ni hi Hong Kong tana zahna tham, kum hnih chhunga mihring dikna chanvo tlakhniam zia pholangtu a ni," tiin a sawi.

Hetih lai hian Hong Kong police-te chuan Cardinal Zen leh midang pathumte hian ram dang leh ram pawna pawlte chu Hong Kong sorkar hrek tura nawrah an puh a, an chetdan hian China national security dinhmun pawh a tiderthawng tih an sawi a ni.

Hong Kong Lingnan University-a scholar Dr Hui hi Europe-ah academic posting nei tura zinchhuah a tum laiin airport-ah man a ni. Denise Ho hi an man ṭum hnihna niin, nikum kum tawp lam khan he dan hnuaiah tho hian man a lo ni tawh.Denise Ho leh Margaret Ng-te pawh hi a hmain man an lo ni tawh bawk.

Hong Kong police-te chuan an mi man palite hi bail-a chhuah an ni dawn a, mahse Hong Kong chhuahsan thei lo turin an passport-te an hrensak zui dawn a ni. An pali hian Hong Kong-a democracy tundin phuta nawrh huaihawtte sum hmanga pui ṭhin nia puh, 612 Humanitarian Relief Fund nen inzawmna neihah puh a ni. Mahse nikuma national security police-te'n he pawl hnenah an member leh donor-te hming leh nihna kimchang thehlut tura a tih hnuah khan he pawl hi tihtawp a ni zui a ni.