Mexico President-in US zin tur a ṭhulh

Mexico President Enrique Pena Nieto chuan kar leha US-a zin a tum chu US President thar, Donald Trump-a’n Mexico leh US ramri hungna bang siam a nih tur thu a sawi avangin a ṭhulh.

US President Donald Trump hian inthlan dawna a lo tiam tawh angin, Mexico ramri hungna bang siamna tur thupek a ziakfel tawh a, bang siamna atana senso-te chu Mexico tum tir vek a ni dawn tih pawh a sawi.

Trump-a thupek tihchhuah a nih hnuah, Nieto chuan ramri hungna bang siam tum chu a dem thu leh, siam a nih pawhin a senso chu Mexico-in a tum loh tur thu a sawi. Hemi hnu hian Trump chuan Mexico hian bang siamna senso a tum duh dawn lo a nih chuan, Mexico President-in Washington-a zin a tum pawh chu a ṭhulh mai a ṭha zawk ang tiin a sawi a, hei vang hian Nieto chuan a zin tur hi a ṭhulh zui ta a ni.

Donald Trump hian campaign lai aṭangin ramri hungna siam hi a tiam a, a senso chu Mexico a tum tir dawn tih pawh a sawi a, mahse hei hi Mexico chuan an pawm dawn lo tih vawi eng emaw zat a sawi tawh a ni.

White House chuan President thar hian chhim lama Mexico ramri hungna bang siamna atan Mexico ram aṭanga bungrua lakluhte chu chhiah 20% zel chawitir a duh niin a sawi.