Gambia President thar Adama Barrow chu Senegal ramah hun eng emaw chen a tlanchhiat hnuin Ningani khan an ramah a kir leh ta. 
Barrow hian nikum December thlaa President thlanna neihah khan, president ṭanglai Yahya Jammeh chu a hneh a ni. Mahse kum 22 zet Gambia ram hruaitu hna lo chelh tawh Jammeh hian inthlan result hi a pawm loh thu sawiin, hun eng emaw chen chu thuneihna pawh a hlanchhawng duh lo a ni. 
President thar lakluh hun tura ruat a thlen dawnin, Jammeh hian an ram pumah emergency a puang a ni. Mahse Senegal rama Gambia embassy-ah Barrow hi president atan rinawmna thu tiamtira lak luh a ni ta tho a ni. 
Thuneihna a hlanchhawn duh loh avangin regional leader-te chuan Jammeh-a hi sipai inrawlh tirah an vau a, hemi hnu hian Jammed chuan president aṭanga ban a remtih thu sawiin, an ram a chhuahsan zui a ni. 
President Barrow-a hian Ningani khan Senegal leh Nigeria sipaite venhimna hnuaiah an ram khawpui, Banjul a thleng. Airport-a chanchinthar lakhawmtute a kawmnaah, Barrow-a chuan an rama a kir leh ta chu a lawm thu a sawi a, an ram tana hun duhawm lo tak chu a ral ta niin a sawi. 
Barrow-a chuan a hna hmasa tur chu a cabinet member turte ruatfel a, a taka hna thawh a nih thu a sawi. President thar lawmna pawh hi buatsaih thuai rin a ni bawk. 
West Africa-a UN palai, Mohamed bin Chambas chuan Gambia ram security dinhmun siamṭhat nan UN chuan a theih angin a pui dawn tih a sawi. Gambia ramah hian West Africa ram sipai ṭhahnem tham tak an la awm mek a ni.