US President Donald Trump chuan kar kalta Zirtawpni khan Syria raltlante lakluh khapna thupek a siam. Muslim ram pasarih - Iran, Iraq, Libya, Somalia, Sudan, Syria leh Yemen aṭanga an rama zin phalna chu ni 120 chhung atan tihtawp lailawk a ni a, Syria raltlante chu thupek awm leh hma chuan an luh khapsak an ni. 
President Trump chuan a thupek siam chu Muslim-te luh khapna tur a ni lo tih a sawi a, US himna tiderthawng thei Islam firfiakte America rama an luh theih lohna tura rua­hmanna pakhat a nih thu a sawi. 
President thupek siam, ‘Protection of the Nation From Foreign Terrorist Entry Into The United States’-ah chuan, 9/11-a firfiakten US an beih hnu aṭang khan US sorkar chuan an rama firfiak luh tumte chu a la dang thei lo niin a tarlang. 
“Kum 2001, Septmber 11-a firfiakte pawikhawihna rapthlak tak a thlen hnu pawh khan, ramdang mi tam tak chu firfiaka chetna kaihhnawiha pawikhawihna thlengah man leh thiam loh chantir an ni tawh a, an zingah hian visitor, student leh employment visa hmanga America rama lut te, US refugee program hnuaia rawn lut te pawh an tel a ni” a ti. 
Donald Trump hian a campaign lai aṭangin Muslim raltlante luh khapna siam hi a lo tiam tawh a, President atana lakluh a nih aṭanga kar khat ral hmain he thupek hi a siam zui ta nghal a ni. Raltlan luh khapna thupek a siam chungchangah President chuan, “Kan sipaiten ram pawn lama an beih mek, ram himna tiderthawng theite chu lakluh loh kan tum a ni. Kan ram danpui thlawp a, kan mipui­te hmangaihtu te chauh lakluh kan duh a ni” a ti. 9/11-a firfiakte pawikhawihna thleng avanga nunna chan te, midangte chhanchhuah hna thawk avanga nunna chan pasalṭha te chu an theihnghilh ngai dawn lo tih sawiin, Trump chuan heng mite hi ṭawngkam chauh ni lo, a takin chawimawi an ni dawn a, chumi atan chuan hma an la ṭan tih a sawi. 

Inrinni khan American Civil Liberties Union (ACLU) chuan President thupek khinna hi a thehlut nghal a, hemi hnu hian US federal judget chuan visa nei leh raltlan ṭhenkhat, US aṭanga thawnchhuah tura tihte chu a dansak. ACLU chuan Muslim ram pasarih aṭanga US zin khapna siam a nih vang hian mi 100-200 vel chu airport-ah lo dan an ni a, valid visa leh immigration permit nei pawh dan tel an ni thu a sawi. 
US District Judge Ann Donnelly chuan an rama refugee application approved, valid visa leh danin a phalsak hmanga US-a awm mekte thawnkirna thupek chu a lo dansak a ni. Airport vela tangkhangte pawh an rawn kalna ramah thawnkir lo turin a ti bawk. 
Christian Broadcasting Network-in a kawmnaah, President Trump chuan ral­tlan zingah Kristian raltlante chu an dah pawimawh tur thu a sawi a, an theih anga puih an tum tih a sawi. Syria rama Kristiante dinhmun chu a chhe hle a, an chungah fir­fiakten an rawng hle niin a sawi. 
Trump hian Zirtawpni vek khan US sipaite hmnaraw ṭha zawk hmanga thuam chakna tur thupek pawh a siam nghal bawk. Sipaite hman tur thlawhtheihna, lawng leh ralthuam dang lei belhna tur thupek a siam a ni. Inthlan dawna a campaign-naah Trump hian sipaite thuam chak a tum thu hi a sawi tawh a, indo lawnglian 274 an neih mek pawh 350 tala tihpun a duh thu a sawi. 
President-in raltlan luh khapna thupek a siam thar hi human rights organisation, eptu pawl Democrats member leh ramdangten an sawisel nasa hle a, US ramchhung hmun hrang hrangah lungawi lohna an lantir a ni. He thupek hi hlih a nih theih nan theihtawpa beih let an tum thu an sawi.