Raltlan luh khap vangin US-ah nawrh chhunzawm
US President Donald Trump-a’n an rama raltlan luh khapna thupek a siam avangin US ramchhunga khawpui hrang hrangah lungawi lohna lantir chhunzawm zel a ni a, New York leh Washington DC-ah pawh nawrh hi kalpui a ni.
Washington DC-ah chuan White House kawtah mi tam tak an pungkhawm a, New York-a Battery Park-ah mi 1,000 vel an pungkhawm bawk. Mipui pungkhawmte chuan Trump-a’n kar kalta Zirtawpni-a Syria raltlante luh khapna thupek leh, Muslim ram pasarih - Syria, Iraq, Somalia, Sudan, Iran, Libya leh Yemen ram aṭanga US-a zin khapna a siamte sut leh turin an phutm a ni.
Pathianni khan US-a aiport hrang hrangah President thupek siam duh lohna hi lantir a lo ni tawh a, airport-ah pawh President-in ram pasarih a tarlanaṭanga US-a zin tum mi eng emaw zat chu dan an ni. Airport-a dan zingah hian dan anga US-a awm phalna neite pawh an tel.
President thupek tihchhuah a nih hnuah, federal judge chuan thupek ṭhenkhat chu lo dansakin, valid visa hmanga US-a lut tawhte chu an ram lamah thawnkir an ni lo ang tih a sawi.
US state 16-a attorney general-te chuan Pathianni khan thuchhuah inṭawm siamin, President Trump-a thupek siam chu an dem thu an sawi. Thuchhuahah hian he thupek avanga harsatna a thlen lohna turin theihtawp chhuah an tumt thu an sawi. Trump-a party, Republican party-a senotor John McCain leh Lindsey Graham-te pawhin President thupek hi an sawisel a, hei hian US security siamṭhat aiin firfiak a tihpun zawk an hlauthawn thu an sawi. US chuan green card neite, an ram anga US ngaitute chu a dang tur a ni lo, an ti.
Democrat Senator Chuck Schumer chuan thupek tihchhuah thar hi hmasialna leh, America kalphung mil lo a ni tiin, sut leh thuai tura a phut thu a sawi.
Mahse President Trump chuan a thupek siam hi kaltlangpui a ni dawn tih sawiin, buaina awmte
chingfel turin an bei zel dawn tih a sawi. US Homeland Security Secretary John Kelly chuan ram pasarih an tarlan aṭanga US-a dan anga awm phalna pek, green card neite chu US-ah an kir leh duh a nih pawhin lo dan an ni dawn lo tih a sawi.