Duterte-a’n ruihhlo laka indo a puan pawtsei

Philippines President Rodrigo Duterte chuan an rama ruihhlo tihrem tuma beihpui an thlak mek chu a president term chhung, kum 2020 thleng atan a pawtsei. Hemi rual hian police force siamṭhat a tiam bawk.

Duterte hian ruihhlo laka indo a puan hi president a nih aṭanga hun rei vak lo chhung neih a ni ang tiin a lo tiam tawh a, ruihhlo do beihpui thlak a nih hnu hian mi tam tak, ruihhlo zuar leh hmangsual nia puhte chu police-te’n an tihlum tawh a ni.

Philippines President chuan nikuma ruihhlo dona beihpui thlakna thupek a siamah khan, December thlaah an rama ruihhlo vanga buaina awm­te chu chinfel hman a lo tiam a, mahse a hnuah a huntiam hi kumin March thla thleng atan a pawhsei leh. Pathianni zana press conference a neih ah, March thla thleng atana a thutiam chu hman a nih loh tur thu sawiin, a term tawp thleng atan a pawtsei tih a puang.

Duterte chuan an ramin ruihhlo vanga buaina an lo neih thuk tawh zia chu chhut thiam phak bak a ni tiin, ruihhlo do beihpui thlak hun pawhsei chu tih ngei ngai a ni, a ti. Police force pawh then thianghlim a, siamṭhat a tum tih a sawi bawk.