Khawvelah Covid-19 hri kai zinga mtd 43.93 dam leh tawh
Khawvel puma hripui leng mek, Covid-19 kai hmuh chhuah tawh zinga 43,93,006 chu enkawl dam an ni tawh. Hetih lai hian he hri vanga thi hi mi 4,65,284 an awm tawh thung.
Hri kai hmuh tawh hi mi 88,42,537 an awm tawh a, US chu hri kai tamna leh he hri vanga thi tamna ber ram a la ni chhunzawm zel. US dawtah hian (5,76,779), Russia (3,39,142) leh India (2,27,728) te chu hri kai tam zualna ram an ni.
US-ah hri vanga thi hi mi 1,19,796 an awm tawh a, Brazil-in dawtin Covid-19 thihpui mi 49,976 an awm tawh bawk. UK-ah mi 42,717 leh Italy-ah 34,634, France 29,636 Spain 28,323 leh Mexico-ah mi 20,781 ten an thihpui tawh bawk a ni.
World Health Organisation (WHO) chuan Covid-19 a len hnuah Pathianni kha khawvel puma hri kai thar an ber ni a ni tih sawiin, hemi hian mi 1,83,020 in hri an kai thar tih hmuh chhuah a nih thu a tarlang. Hri kai hmuh chhuah zinga mi 54,771 hi Brazil ram mi an ni a, US-ah kai thar 36,617 an awm bawk. Hemi ni vek hian hri vanga thi hi mi 4,743 an awm a, an zinga hmun thuma ṭhena hmun hnih chuang chu America ram mi an ni.
US leh Brazil bakah South Africa leh Latin America ramahte hri kai hi an la pung chak hle. South Africa-ah chuan Inrinni liam ta khan hri kai thar 5,000 dawn awmin ni khata hri hmuh chhuah tam ber ni a ni a, mi 46 in an thihpui bawk. Hetih lai hian president Cyril Rampahosa chuan inkharkhipna ṭhenkhat a thlahdul a; casino, beauty salon leh sit-down restaurant-te chu an inhawn phalsak an ni dawn.
China leh South Korea-ah pawh Pathianni khan hri kai hmuh chhuah thar an ni leh. China-ah hri kai mi 22 hmuh thar niin, an zinga 22 chu Beijing-a mi an ni. Beijing thuneitute chuan zin chhuak turte tan Covid-19 an kai lo tih finfiahna nei phawt turin a ti.
South Korea-a hri kai hmuh zinga 200 dawn chu an chhui chiannaah door-to-door sales company-a thawktu pakhat aṭanga an kai tih hmuh chhuah a ni a, mi 70-te hri kaina chu table tennis club thiltih khawmna aṭangin nia sawi a ni bawk. Mahse hetichung hian sorkar chuan social distancing rules a thlahdulna chu a la siamṭha duh lo a ni.
Spain chuan thla thum chhung inkharkhipna a kalpui hnuah state of emergency a puan chu titawpin, mipuite chu pawnchhuah leh an ram chhunga an zinkual pawh a phalsak tawh a ni. An ramah khualzin an luh pawh a phalsak tawh bawk a, Britain leh Europe ram 26 aṭanga lutte ni 14 chhung khung hran phawt tura a tih ṭhin pawh a tihtawp tawh bawk.