Trump-a'n Covid-19 test neih tlem duh

US president Donald Trump chuan kar liam ta Inrinni khan an rama Covid-19 test neih chu tihtlem a duh thu official-te a hrilh tih campaign a neihnaah a sawi.

Trump chuan US-a test neih tawh zat hi mi maktaduai 25 chuang a nih thu sawiin, ram dang zawng zawng aiin US chuan test a nei hnem ber tih a sawi bawk. "Test kan neih belh zel chuan hri kai an awm belh zel dawn a, chuvang chuan test neih hi tihtlem a ṭha tawh zawkin ka hria," tiin Trump chuan kumina US president thlanna neih tur atana  Oklahoma khawpui Tulsa-a campaign a neihnaah a sawi a ni. 

Hetih lai hian White House official chuan Trump-a'n Covid-19 test tihtlem tuma a sawi hi fiamthu a nih thu a tarlang a, chutih rualin US chu khawvela Covid-19 test nei hnem ber ram a nih thu leh mihring mtd 25 chuang test an neih pui tawh tih a tarlang bawk. Chanchinbumi ṭhenkhatten Trump chu hri dona kawnga a hmalakna sawisel mah se, Trump chuan China leh Europe ram aṭanga US-a zin luh a khap avangin an rama mi tam tak nunna chhanhim a nih phah thu a sawi. 

Health expert lam chuan test neih belh zel hi a ṭul thu an sawi a, hemi rual hian  mi zawng zawng test neih pui a ṭul vek loh thu an tarlang bawk. 

Hetih lai hian hri leng vanga khuahkhirhna siamte thlahdul a nih chhoh hnuah, US-a state tam takah hri kai hi an pun belh nasa hle. Florida state-ah chuan a zawnin ni li chhung hri kai tam ber ni an thleng a, Inrinni khan hri kai thar hi mi 4,049 an awm. 

South Carolina, Missouri, Nevada, Azirona, Utah leh Montana-ah te pawh hri kai tam ber ni record an siam a ni.