NKorea-ah Covid-19 vanga thihna hmasa ber thleng

North Korea chuan an ramah Covid-19 hri kai an awm thu official-a a puan chhuah hnu lawkah, he hripui vanga thi hi an awm thu a puang zui leh.

Ningani khan NKorea hian an ramah Covid-19 hri kai an awm thu hi a puang a, a zat erawh a sawilang lo. Hemi hnu, nimin khan Omicron kai mi paruk an thi tih a puang zui leh nghal a ni. Hei bakah hian khawsik nei, mi 1,87,000-te chu khung hrana enkawl mek an ni tih a sawi bawk.

NKorea hian an ramah hri kai an awm thu hi puang chauh mah se, mithiamte chuan hun eng emaw chen a len tawh a rinawm tawh tih an sawi.

State news agency, KNCA chuan nimin khan an ram khawpui, Pyongyang bakah hmun dangah pawh hri hi a darh niin a sawi a, 'April thla tawp lam aṭang khan mi tam tak chu an khawsik chhan hriat silohin khawsikin an awm tawh a ni," a ti. Mi nuai 3.5 vel chu an khua a sik tih a sawi a, mahse an zingah hian Covid test neih zat leh hri kai zat erawh a sawilang lo. Hri kai an awm thu puan a nih hnuah hri darh tur venna atan inkharkhipna kalpui nghal a ni.

NKorea mipui maktaduai 25 chuang te hian vaccine programme mumal tak an neih loh avang leh healthcare changtlung ṭha an neih loh avangin an dinhmun a ṭha dawn lo hle niin mithiamte chuan an sawi.

Ramdang aṭanga AstraZeneca leh China siam vaccine thawn luh tumna chu NKorea hian a lo hnawlsak tawh a, kum 2020 January thla tir lam aṭang khan an ramri kharin Covid hri lut tur hi an veng thei niin an sawi a ni.

NKorea hian SKorea leh China nen ramri inṭawm an nei a, heng ram pahnihah hian Covid hi a darh chho leh nasa hle. China hian Omicron vangin an khawpui lian hoah inkharkhip an kalpui mek a ni.

KCNA chuan North Korea hotu Kim Jong-Un chuan nimin khan healthcare centre-te tlawhin, an ramchhunga Covid-19 darh mek dan leh hmalak dan turte a sawipui niin a tarlang.