Sri Lanka PM thar atan Ranil Wickremesinghe ruat

Sri Lanka president Gotabaya Rajapaksa chuan Ningani khan Prime Minister hlui Ranil Wickremesinghe chu PM thar ni turin a ruat nawn leh.

Kum 73 mi, Wickremesinghe hi PM atana vawi ruk an ruatna ni tawhin, office a chelh chhung hian a term a la hmang zo ngai lo thung. An ram economy tlu chhe mek siamṭha turin hna hautak takin a hmuah mai bakah an ram mipuite'n a ban phuta an nawr mek president Gotabaya Rajapaksa hnuaiah a thawk dawn a ni.

United National Party (UNP) hotu Wickremesinghe hi President Gotabaya Rajapaksa chuan President office-ah rinawmna thutiamtira lakluh a ni. PM atana lakluh anih hnua thu a sawiah, Wickremesinghe chuan rampum buaina chu titawp a, an ram economy tuaithara ngaiawh tir leh a tum thu a sawi.

Wickremesinghe hi pa rorel thiam, an ram economy siam ṭha thei tura mi tam takina an rin leh Sri Lankan politician zinga ramdang nena thawhhona ṭha tak siam thei tiin an sawi.

UNP hi an rama party upa ber ni mah se, an tlahniam tawh hle. Kum 2020 parliamentary inthlananah khan UNP ṭhatna hmuna an sawi, Colombo-ah pawh Wickremesinghe hi a tling zo lo a ni.