New York City-a Roosevelt-a lim dahbo tum

American Museum of Natural History, New York City chuan an museum Central Park West entrance kawta awm Theodore Roosevelt-a lim chu chi inthliarna lam hawi nia a lan avangin dahbo a ni dawn tih an puang. 

Theodore Roosevelt-a lim hi kum 1940-a daih kha niin public park-ah langsar takin a awm a ni. Roosevelt hriatrengna lim niin Roosevelt chu sakawr chungah a chuang a, a bulah chuan Native American leh African pakhat an ding a ni.

Mayor Bill de Blasio chuan hemi chungchangah hian thuchhuah siamin The American Museum of Natural History chuan mihang leh ram leilung neitute aia mingo chungnunna lantirna nia ngaih theih a nih avangin Theodore Roosevelt lim chu dahbo an dil tih sawiin Museum dilna chu an pawmpui thu leh, chu lim chu dahbo hun tak pawh a nih thu a sawi.

American Museum of Natural History hi hripui leng vangin khar mek a ni a, an website-ah chuan Roosevelt-a lim hian sawisel a hlawh hle tawh ṭhin tih tarlangin chi inthliarna lam hawi nia sawitu an tam thu pawh an tarlang a ni. Kum 2017 leh 2018-ah pawh khan dahbo an tum tawh tih leh thutlukna mumal a awm theih loh vanga la dahbo loh a nih thu an tarlang bawk.

Theodore Roosevelt kha US President 26-na a nih hma khan New York governor a ni ṭhin a, New York Times tarlan dan chuan a thlah kal zel zinga mi pakhat chuan Roosevelt lim chu dahbo a remti ve bawk a ni.