NKorea-ah ni 3 chhungin Covid-19 kai mi 8,20,620 awm

North Korea chuan an rama Covid-19 hri kai an awm avanga ram puma inkharkhipna a kalpui hnuah, nimin khan khawsik vangin mi 15 thi an awm belh thu a tarlang.

State media KCNA chuan hri vangin mi 42 an thih tawh thu leh hri kai mi 8,20,620 awm tawhin, heng zinga mi 3,24,550 chu damdawi nena enkawl mek an nih thu a sawi.

KCNA chuan province, khawpui leh county zawng zawngte chu inkharkhipna hnuaiah an awm vek tawh a, working unit, production unit leh residential unit-te pawh khar vek an ni, a ti.

NKorea mipuite hian Covid vaccine an la la lo a, sorkar chuan hri darh tur venna kawngah emergency quarantine system ṭha thei ang berin an kalpui tih sawi mah se, tunah chuan an ramah hri kai an awm thu a nemngheh hnu lawkah, nitin hri kai hi nasa takin an pung chho a ni.

Kar liamta Ningani khan NKorea sorkar hian an ramah Covid hri inkaichhawn awl tak, Omicron variant kai chu an ram khawpui, Pyongyang-ah an awm thu a sawichiang ve chauh a, ram pumah lockdown puan nghal a ni bawk.

North Korea hi khawvela health system nei chhe ber zinga mi an ni a, Covid vaccine an neih loh bakah antiviral treatment drug emaw mass testing capacity emaw pawh an nei lo a ni.

China leh World Health Organization Covax scheme kaltlanga Covid vaccine pek an tumna pawh an lo hnar tawh a, mahse China leh South Korea-te chuan damdawi leh vaccine pek tumin hma an la leh mek.

KCNA chuan hri kai thar leh thihpuite hi Covid-19 positive an ni em tih an tarlang lo a, mahse mithiamte chuan an ramin Covid test leh natna endik kawngah harsatna an hmachhawn an rin thu an sawi.

Hri lengin a tihbuai mek karah Kim hian nuclear test dang neih a tum thu United States leh South Korea chuan an sawi a, a rorelna hnuaia nuclear an kahchhuah ṭum sarihna tur chu tun aṭanga ni rei loteah a thlen theih thu an sawi.