US-a chi inthliarna rawng kaia inkahna thlengah mi 10 thi

United States-a mi ngo kum 18 mi, ralthuam keng chuan kar liam ta Inrinni khan New York, Buffalo-a grocery store-ah chi inthliarna nia ngaih theih zawngin pawikhawihna a thlen a, mi 10 a kaphlum. A pawikhawih lai hi mipui hmuh theih turin live-in a pechhuak tih thuneitute chuan an sawi.

Silai kengtu hi pawikhawihna a thlen hnu lawkah man a ni a, man a nih lai pawh hian helmet leh tactical gear nen a inthuam tih Buffalo Police Commissioner Joseph Gramaglia chuan a sawi.

Gramaglia chuan pawikhawihtu hian Tops supermarket-a parking lot-ah mi pali kapin an zinga pathum an thi a, a hnuah supermarket chhungah lutin a kap chhunzawm tih a sawi. Dawr chhunga a kahhlum zingah hian police officer chawl tawh, security guard-a an chhawr chu a tel. Guard hian silai keng hi ringhlelin a lo kap a, mahse ani hi body armor hak chuan a chhanhim a, guard hi a kaphlum zui ta zawk a ni. Police-te thlenin silai kengtu hi a inpe zui ta a ni.

FBI Buffalo field office-a special agent in charge, Stephen Belongia chuan inkahna hi tum lawk leh huatna neisa a thleng anih thu a sawi. "Pawikhawihna hi chi inthliarna, huatna vanga nunrawng taka chetna a ni," tiin Belongia chuan a sawi.