NKorea-in S Korea thungrulh a tum

North Korea chuan  South Korea thung­rulhna turin dodalna thu ziahna, lehkha (leaflet) maktaduai 12 thawn lut tura a inpeih thu nimin khan Korean Central News Agency (KCNA) chuan a tarlang.

Leaflet te hi balloon 3,000 hmanga thawn tum a nih bakah, hmanraw dang pawh hman tel an tum nia sawi a ni. Observer ṭhenkhat chuan NKorea hian balloon mai piah lamah hian leaflet thawnna atan hian drone a hman tel an ring. 

NKorea-in he  thil a buai­pui na chhan chu SKorea-a pawl ṭhenkhatin NKorea hotu leh sorkar sawiselna thu ziahna lehkha te balloon hmanga an thawnluh ṭhin vang a ni. Lehkha them an thawnluhah hian North Korea hotupa Kim Jong Un chuan mihring dikna leh chanvo a rap bet tih inziak te a chuang a, hei bakah hian US dollar 1, radio, USB stick, Skorean drama leh kawng hrang hranga NKorea demna leh selna thute an thawn lut tel ṭhin. 

Hengte avang hian NKorea chuan June thla tir khan South Korea nena an inbiakpawhna zawng zawng a titawp vek a, ram pahnih hruaituten an hman hotline pawh a titawp tawh a ni. June 13 khan N Korea chuan a lungawi loh vangin South Korea laka sipai chakna hmanah a lo vau tawh a, ram pahnihte ṭhen hrangtu demilitarised zone (DMZ)-ah North Korea sipai lama thuneitute chuan an ram sipai thawnluh an tum thu an lo tarlang tawh bawk a ni.

KCNA chuan SKorea-a leaflet an thawn tur chu an ram mipuite thinrimna leh lungawi lohna lanchhuah tirna a ni tiin,  inhrem letna hun chu a hnai tawh tih an tarlang.

North Korea thinrim chuan June 16 khan ram pahnihten office inṭawm an neih, North Korea-a Kaesong Industrial Region hmuna Inter-Korean Liaison Office chu a bomb chhe tawh bawk. Indo thlen palh thilah hman theih turin North Korea chuan an ram hmarchhak lam, Sinpo-ah a rukin sipai lawng chawlh hmun, underground naval base a siam tih researcher, Jacob Bogle chuan kar liam ta khan  a lo sawi tawh bawk. 

Seoul Unification Ministry thu­puangtu Yoh Sangkey chuan North Korea chuan Seoul dodalna inziahna leaflet an rama thawn luh a tum chu a ṭhulh tur a ni, tia sawiin ram pahnih inkara inremna awmna tur kawnga thil awmze nei lo a nih thu nimin khan a sawi

.

Sankey chuan NKorea dem leh sawisel zawnga lehkha thawn ṭhin chungchangah police-te pawhin pawl pahnih chu rinhlelh thilah an man tawh tih a sawi. 

Observer-te sawi anga NKorea-in leaflet thawnna atana drone-te a hmang tel a nih phei chuan SKorea hian a enliam mai theih a rinawm lo hle a, ram pahnihte inkarah buaina  lian zawk a chhuah a hlauhthawnawm hle.