Trump-a’n thupek zawm duh lotu attorney general a ban

US President Donald Trump chuan Muslim ram pasarih aṭanga an rama lut turte khapna thupek a siam zawm duh lotu, acting attorney general Sally Yates-i chu a ban.

Kar kalta Zirtawpni khan Trump hian US-a Syrian raltlan leh, Muslim ram pasarih aṭanga luh tumte khapna thupek hi a siam a, mahse Thawhṭanni khan Sally Yates-i hian Trump-a thupek hi zawm duh loin, department lawyer-te chu President thupek thlawp lo turin a hriattir bawk. Hemi hnu lawk hian a nihna aṭangin ban a ni zui ta a ni.

White House press secretary office chuan thuchhuah siamin, “Acting Attorney General, Sally Yates-i chuan United States mipuite himna tura thupek siam chu a zawm duh loh avangin Deparment of Justice a phatsan a ni” a ti. Yates-i chu President hlui Barack Obama kaihhruai sorkar­in a ruat a ni a, ramri venhimna leh dan loa US-a ramdang mi pemlutte venna kawnga mi chak lo tak a nih thu a tarlang bawk.

Yates-i thlaktu atan hian Trump chuan Senator Jeff Sessions a ruat a, Senate-in a pawm hma chuan acting US attorney general hna hi Virginia Eastern District Attorney, Dana Boente chuan a lo chelh lailawk dawn a ni. Boente chuan President-in khapna thupek a siam chu kenkawh a tum thu Washington Post-in a kawmnaah a sawi.

President Trump-a thupek siamah hian, US refugee programme chu ni 120 chhung atan tihtawp a ni a, Muslim ram pasarih - Iran, Iraq, Libya, Somalia, Sudan, Syria leh Yemen ram aṭanga US-a pem lutte chu ni 90 chhung atan an luh khap an ni bawk.

Trump hian Thawhṭanni khan thupek thar a siam leh bawk a, he thupek hnuaiah hian US fe­deral agency-te chuan rules awmsa paih an duhte chu White House-ah thlenin ennawn a ni dawn a, emergency leh national security rules erawh a huam tel lo. He thupek hi US ram chhunga sumdawng lian leh tenau-te’n an hlawkpui dawn niin President chuan a sawi a, White House-a sumdawnna tenau zawk neitute a kawmnaah, sumdawnna lama dan an neih mekte chu a ṭha tawk lo hle tih a sawi a ni.