Saeed-a pawn chhuak thei loin hreng
Pakistan sorkar chuan Jamaat-ud-Dawa (JuD) pawl hotu, Hafiz Muhammed Saeed chu pawn chhuak thei lo turin a hreng. Saeed-a hi kum 2008-a firfiakten Mumbai khawpui an beihnaah khan a bultumtu bera puh a ni a, he pawikhawihna thlengah hian mi 160 chuang an thi a ni.
Pakistan police-te chuan Thawhṭanni zan khan Saeed-a hi a charity, JuD headquarters-ah an man a, hemi hnu hian a chenna inah police venna hnuaiah house arrest-a dah zui a ni. Police thupuangtu, Nadeem Awan chuan a chenna in lama Saeed-a hruai a nih hian JuD thlawptu mi tam takin an zui niin a sawi.
Kum 2012 khan US sorkar chuan Saaeed-a man a nih theihna atana a chanchin hrilh thei hnenah US dollar maktaduai 10 pek a lo tiam tawh a ni. Saeed-a hian charity pawl, JuD a enkawl bakah, firfiak pawl Lashkar-e-Taiba (LeT) dintu a ni bawk.
LeT hi India rama security force leh civil mite beihna hrang hrangah a inhnamhnawih fo a ni. Saeed hi hun rei tak aṭang tawhin LeT aṭang hian a inla hrang a, JuD chauh chu a enkawl tawh nia sawi a ni. Mahse UN leh US chuan JuD hi LeT nena inzawmah dahin, heng pawl pahnih leh Saeed-te hi international sanction list-ah a la dah chhunzawm reng a ni.
Pakistan sorkar chua kum 2002 aṭang khan LeT hi firfiak pawlah a puang a, kum 2008 khan an pawl hminga thil neihte khawih chet theih loha hrek sak an ni. Mahse he pawl hi Pakistan ramchhung hmun hrang hrangah an la khawsa zui reng a, seminar-te huaihawtin thuchhuah hrang hrang an siam fo bawk.