Quebec mosque beitua puh tualthah thubuai siamsak
Canada rama Quebec City mosque bei a, mi paruk kaphlumtua puh French-Canadian university zirlai chu man a nih hnuin tualthah thubuai siamsak a ni.
Pathianni tlai khan Quebec City mosque-a ṭawngṭaina hun hmanga awmte chu silaia pawng kah an ni a, mi paruk an thih bakah mi dang eng emaw zatin hliam an tuar. Police-te chuan mosque beitu nia puh, kum 27 mi Alexandre Bissonnette chu manin, tualthah thubuai paruk leh tualthah tuma puhna thubuai panga an siamsak a ni.
Université Laval zirlai, Bissonnette hi venhimna khauh tak hnuaiah court-ah hruai a ni a, mahse prosecutor-te’n finfiahna hrang hrang awmte chu peihfel vek ala ni lo tih an sawi avangin February 21-ah inlan leh tura tih a ni.
Quebec City-ah hian mi 500,000 chuang an cheng a, kum 2015 chhung khan he khawpuiah hian tualthahna ṭum hnih chiah a thleng a ni. Canada ramah hian gun control law khauh tak an hman avangin inpawngkahna hi a thleng khat hle.