Trump-an Supreme Court Justice atan Neil Gorsuch a rawt

US President Donald Trump chuan Supreme Court justice thar atan judge Neil Gorsuch a rawt.

Kum 49 mi, Neil Sorsuch hi 10th Circuit, U.S. Court of Appeals, Denver, Colorado-a judge ṭanglai a ni a, kum 25 chhunga Supreme Court justice atana nominee ni tawh zinga naupang ber a ni.

President-in Supreme Court justice atana a rawt hi Senate-in a pawmpui ve leh phawt a ngai dawn a ni. Hetihlai hian Democrats member-te chuan President hlui, Barack Obama’n a lo thlan tawh, Merrick Garland ni lo midang chu block an tum thu an sawi. Garland-a hi nikum khan Republican-te chuan an lo block ve thung a ni.

Nikum February thlaa Justice Antonin Scalia a thih hnu khan amah thlaktu tur chung­changah Democratic leh Republican member-te hi an la inlungrual thei lo a, hei vang hian a hmun ruak hi thla 10 zet hnawhkhah lohin a awm tawh a ni. Trump-an a thlan chhuah, Judge Gorsuch hian Senate Judiciary Committee paltlang mah se, chamber pum vote a hmachhawn ve leh a ngai dawn a ni.

Committee-ah hian member 20, Republican 11 leh Democrats pakua an awm. Committee hian confirmation hearing a neih hmain nominee tunhma chanchinte zirin, research an nei phawt dawn a ni, nominee-in a chhan tur questionaire-te an siam ang. Hemi hnu hian confirmation hearing neih a ni ang a, nominee bakah witness-te pawh zawhna zawh an ni ang. Hearing zawh hnuah commitee chuan Senate-ah report a thehlut dawn a, Senate-ah vote lak a ni leh ang. President nominee pawm tur hian Senate-ah vote 60 a hmuh a ngai dawn a, Republican lam hian seat 52 an nei a, Democrats-in 48. Hei vang hian nominee hi Democrats lam hian an la block ve leh thei dawn a ni.

Donald Trump-an Supreme Court Justice atana a thlan hi Conservative ruh tak a ni a, Trump chuan Gorsuch hi dan kengkawh tura an ramin a mi mamawh tak a ni tih a sawi a, party pahnihte pawhin an thlawp ngei a beisei thu a sawi. Vice President Mike Pence pawhin Gorsuch chu America chanchin-a supreme court nominee zingah mi zahkai leh mithiam chungchuang tak a nih thu a sawi a, Republican party member-te pawhin an fak hle.