Missile enchhin hi nuclear deal palzutna a ni lo : Iran
US chuan Pathianni khan Iran-in an ram khawpui, Tehran khawchhak lam, Semnan bulah ballistic missile a enchhin niin a sawi a, hei hi Iran foreign minister Mohammad Javad Zarif chuan chhangin, missile enchhin chu nuclear deal an lo siam tawh palzutna a ni lo tih a sawi a, an enchhin nia puhna erawh a sawichiang duh lo.
Iran missile kahchhuah nia sawi, medium-range missile hi km 1,010-a thuiah a puak nia sawi a ni a, hetiang missile a enchhin hnuhnun ber chu kum 2016 July thlaah khan a ni. Iran-in missile a enchhin nia sawi hi kum 2015-a UN resolution siam palzutna nia sawiin, ram hrang hrangten an sawisel.
Iran hian km 2,000 china thui kap thei missile a nei niin a lo sawi tawh ṭhin a, he missile hian Middle East hmun tam zawk, Israel thlengin a kap pha dawn a ni. Iran chuan a missile-te chu US leh Israel-in an beihna lo danna tur a ni tiin, an ram chuan ballistic missile chu invenhimna atan chauh a hmang dawn a ni, a ti.
Israel Prime Minister Benjamin Netanyahu chuan Washington-a US President Donald Trump a hmuh hunah, Iran chungchang hi sawipui ngei a tum tih a sawi. Netanyahu chuan, Iran hrekna siam thar te, ballistic missile enchhim khap sak leh, nuclear deal a hlawhchham dante hi Trump chu sawipui a tum.