Israel-in West Bank-a in 3,000 sak belh dawn

Israel sorkar chuan Palestinian ram a luah, West Bank-a Israel mite chenna tur in 3,000 a sak belh tur thu Thawhlehni khan a puang leh. January 20-a US President atana Donald Trump lakluh a nih hnua Israel sorkarin in sak belhna tur a puan ṭum thumna a ni.

Kum 1967 indo hnua Israel-in ram a lakte enkawl zuitu, Israel Defence Ministry chuan thuchhuah siamin, West Bank-a Israel mi chengte mamawhna avangin in sak belhna tur thu­tlukna hi siam a nih thu a sawi.

Hetihlai hian West Bank-a dan loa Palestinian ram, Amona outpost-a Israel mi cheng, mi 330-te chu an awmna chhuahsan tura tih an ni thung. Supreme Court chuan February 8 hma ngeiin Amona outpost-a chengte hi chhuak turin a lo hriattir tawh a ni.

Israel sorkar hian kar hmasa khan West Bank-a Juda-te chenna tur in 2,500 sak belh a nih tur thu a puang a, hei hi Palestinian leh EU chuan na takin an sawisel. Mahse hemi hnu lawk hian East Jerusalem-a chenna in 560 sak belhna tur a puang zui leh a ni.