NKorea-ah Covid hri chak takin darh mek, mi 50 in thihpui tawh

North Korea ramah Covid-19 hri leng chu chak takin a darh mek a, Covid-19 kai hmasa ber an hmuhchhuah hnuah thihpui hi mi 50 an tling tawh a ni.

Hri kai hmuh chhuah a nih thu an puan hnuah ram pumah lockdown puan nghal ni mah se, nimin thleng khan mi maktaduai khat chuang chuan Covid symptom, khawsik an nei niin state media chuan a tarlang.

NKorea hotu, Kim Jong Un chuan hri leng an hmachhawn dan chu sawiselin, sipaite chu damdawi semchhuah hna thawhna kawnga pui turin a ti. Kim chuan healthcare official-te chu nasa taka sawiselin, hri leng khuahkhirh kawnga hna thawk ṭha tawk loah puhin, chhun zan zawma damdawi semchhuahna hmun an hawng thei lo chu a sawisel a ni. Hei vang hian sipaite chu Pyongyang-a damdawi semchhuah hna chak zawka kalpui a nih theihna tura pui turin a ti a ni.

Kim hian damdawi zawrhna hmunte tlawhin a hmunah thil awmdante a enfiah a, damdawi semchhuah ṭhat a nih loh chhan chu cabinet leh public health sector incharge-ten an ram dinhmun dik tak an hriatchian tawk loh vang niin a ngai.

NKorea hi khawvela healthcare system nei chhe ber zinga mi an ni a, damdawi-in thawmṭhat loh te, intensive care unit tlem lutuk te, covid enkawlna damdawi emaw mass testing neihna emaw an neih ṭhat tawk loh thu mithiamte chuan an sawi.

Covid-19 hri a len tirh aṭang hian North Korea hian hri leng laka invenna turin a ramri te a khar nghal a, a ṭhenawm ram pahnih, China leh South Korea-ah inkaichhawn awlsam tak, Covid-19 Omicron variant nasa taka a darh hnuah mithiamte pawhin NKorea-ah hian hri hi a luh ngei a rinawm thu an lo sawi tawh a ni. Mahse hun rei tak an ramah Covid-19 hri kai an awm lo tia an ṭan reng hnuah, kar liam ta khan an ramah Covid hri kai hmuhchhuah an nih thu official-in an puang ve chauh a ni.

South Korea-in chhawmdawlna pek tum
South Korea president Yoon Suk-yeol chuan nimin khan an ṭhenawm, North Korea ram ṭanpui turin theihtawp chhuah an tum thu leh chhawmdawlna pe turin inbiakna neih ṭhat pawh a inpeih reng tih a sawi.

"North Korea-in kan ngennate min chhanglet a nih chuan eng damdawi mah kan ui dawn lo, a bikin Covid-19 vaccine, medical equiptment leh health lama hnathawkte hmangin kan ṭanpui dawn a ni," tiin Yoon chuan National Assembly-ah a sawi a ni.

Yoon chuan US president Joe Biden chu Indo-Pacific Economic Framework kaltlangin global supply chain hmanga chak zawka thawhdun dan turte sawipui a tum thu a sawi bawk. Biden hian kar leh hian South Korea hi a tlawh dawn a ni.