US-ah inkahna thleng leh, mi 3 an thi

United States-a New York-a grocery store-a chi inhuatna rawng kaia inbeihna thlenga mi 10 kahhlum an nih hnuah, Pathianni khan hmun pahnihah inkahna a thleng leh a, mi pathum an thi.

Pathiannia inkahna thlenna pakhat hi Los Angeles-a biakinah a ni a, silai keng mi pakhatin zing lama inkhawm bangte thil ei tura awmkhawm chu silaia pawng kahin mi pali na takin a kap hliam a ni. Silai hmetpuaktu hi Asia lam mi, kum 60 bawr vel a ni. Biakin pana kalte hian manin, a kut aṭang hian ralthuam chi hnih an mansak a ni. A mi kah hliamte pawh hi Asian leh Taiwan lam ni an ni tih thuneitute chuan an sawi.

Inkahna dang thlenna hi Texas-a Harris County-ah a ni. Harris County Sheriff Office chuan flea market-ah mipui punkhawmnaah vawi eng emaw zat silai hmehpuah a nih thu leh, a hmunah hian mi pahnih an thih thu a sawi. Mi pathum chu damdawi-inah dah luh nghal an ni bawk.

Kar liam ta Inrinni khan kum 18 mi chuan New York-a grocery store pakhatah mi 10 kaphlumin, rawng taka a che lai hi mipui hmuh theih turin live-in a pechhuak a ni. Thuneitute chuan he pawikhawihna hi chi bing inhuatna vanga thleng a nih thu an sawi. Pawikhawihna a thlen hnuah hian silai kengtu hi man zui nghal a ni.