Red Cross-in Afghanistan-a an hna thawh tihtawp

International Committee of the Red Cross (ICRC) chuan an hnuaia thawk mi paruk-te thah an nih avangin Afghanistan rama chhawmdawl hna an thawh chu an titawp tih an sawi.

Afghanistan hmarlam, vur thli tleh vang­a harsatna tawkte chhawmdawlna tur sem tura kal, Red Cross hnuaia thawkte chuanna convoy chu Islamic State (IS) firfiak nia hriatten an bei a, mi paruk an kaphlum a, charity worker pahnih chu chin hriat lohin an la awm mek bawk. ICRC chuan he thil thleng hi kum 20 zet Afghanistan mite tana chhawmdawlna hna an thawh chhunga an mi leh sate beih an nihna nasa ber a ni thu a sawi a, mahse pawikhawihtute hi an hriatchian loh thu a sawi.

Kar kalta khan Afghanistan hmarlam bial­ah vur thli nasa taka tlehin vur tla hi metre hnih zeta chhahte a ni. Vur thli tleh vang hian mi 100 chuang an thi niin official-te chuan an sawi. Vur tla nasa vangin mipuiten harsatna an tawk a, heng mite mamawh pe tur hian chhawmdawl hna thawktute hi an kal a ni. ICRT team tirh zingah hian driver pathum leh field officer panga an tel a ni.

Taliban firfiak pawl chuan Red Cross team beihnaah hian an inrawlh loh thu a sawi a, an pawl thupuangtu Zabiullah Mujahid chuan pawikhawihtute zawn­chhuahna kawnga Taliban member-te chuan theihtawp an chhuah tur thu a sawi.