Myanmar-ah Rohingya muslim 1,000 chuang thah an ni : UN

United Nations official-te chuan Myanmar sipaiten Rakhine state-a beihpui an thlaknaah Rohingya Muslim 1,000 chuang an that niin an sawi.

Myanmar hmarthlang lamah hian Rohingya muslim hi makta­duai 1.1 vel an cheng mek a, mahse sorkar chuan an ram mi nihna a pe duh lo a, an ram mipui tam zawk chuan Bangladesh aṭanga dan loa pem lut angah an ngai a ni.

Nikum October thla khan police border post beih a ni a, he thil hi Rohingya helte tih nia ngaiin sipaite chuan beihpui an thlak zui nghal a ni. Sipaiten beihpui an thlaknaah hian Rohingya mi 1,000 chuang zet thah an ni tawh niin UN senior official pahnih chuan an sawi a, mi tam tak chu Bangladesh ramah an tlanchhe tawh bawk a ni, an ti.

Myanmar president thupuangtu, Zaw Htay chuan sipai commander-te hnen aṭanga report an dawn hnuhung berah chuan Rohingya hel nena an inbeihnaa thi chu mi 100 an la tling lo niin a sawi a, UN official-te sawi dan nen an inang lo avangin an enfiah dawn tih a sawi.

Rakhine state-a sipaite an luh hnu hian thuthar lakkhawmtute luh phalsak an nih ve loh avangin thil thlen dan dik tak hriat a har hle. U.N. Office of the High Commissioner for Human Rights (OHCHR) report chuan sipaite hian civil mite pawng thah leh pawngsualna an thlen nasa a, khua pawh halsak te a awm niin an sawi a, mahse he report hi Myanmar sorkar lam chuan a pawm lo thung. UN chuan sipaiten beihpui an thlak hnuah Rohingya 69,000 vel chu Bangladesh ramah an tlanchhe tawh niin a sawi.