US appeal court-in sorkar ngenna hnawl

9th US Circuit Court of Appeals chuan President Donald Trump-a’n Muslim ram pasarih aṭanga zin luh a khapna thupek tihtawp lailawk ngaihtuah ṭha tura ngenna chu a hnawlsak.

President Trump-an Muslim ram pasarih - Iran, Iraq, Libya, Somalia, Sudan, Syria leh Yemen ram aṭanga US-a luh khapna a siam chu court-in a tihtawpsak a, President thupek hi kenkawh a nih leh theihna tura ngaihtuah ṭha turin Justice Department chuan a ngen a ni. Appeal court-in a hnawlsak avangin hemi chungchang hi Supreme Court-ah an thlen leh rin a ni.

Appeal Court chuan Justice Department ngenna siam hi ngaihtuahin, President-in ram pasarih hming a tarlan aṭanga lutte hian US-ah firfiak zawnga pawikhawihna an thlen ngei tih finfiahna a awm lo tih a sawi a, he khapna siam hi Muslim-te thliarhranna anga ngaih theih a nih thu sawi bawk.

President Trump chuan an ngenna appeal court-in a hnawlsak chu na takin a sawisel a, an ram himna chu dinhmun derthawng takah a dah niin a sawi a, a thupek lo siam tawh chu kenkawh chhunzawm zel a nih theih nan dan hmanga beih chhunzawm zel an tum tih a sawi.