Trump-an ramri bang siam a tumah US dollar tld 21.6 lai ngai dawn

US President Donald Trump-an Mexico nen an inri-naah ramri hungna bang siam a tum thu a lo sawi tawh a, he bang siamna tur hian dollar tluklehdingawn 21.6 vel a ngai dawn niin US Department of Homeland Security report chuan a sawi. Bang siam tur hian kum thum aia rei a ngai dawn tih a sawi bawk.

Donald Trump hian inthlan campaign laiin Mexico ramri hungna bang siam a tum thu a lo sawi tawh a, hemi atan hian dollar tluklehdingawn 12 a ngai dawn niin a sawi. A hnuah Republican House Speaker Paul Ryan leh Senate Majority Leader Mitch McConnell-te chuan dollar tld 15 a ngai dawn niin an chhut ve leh a, mahse Department of Homeland Security (DHS) report chuan an lo chhut lawk ai hian a hautak zawk hle dawn tih a tarlang ve leh a ni. DHS report hi Secretary John Kelly chuan a pharh thuai rin a ni. Mexico leh US ramri hi km 3,145 zeta thui a ni a, DHS in ruahmanna a siamah chuan ramri hung hna hi thawh thuma thawkin, kum 2020-ah ramri km 2,000 a thui chu hung zawh hman a ni thei chauh dawn niin a tarlang.