Peru president hlui man turin hriattir

Peru judge Richard Concepcion chuan an ram president hlui, Alejandro Toledo chu thamna sum, dollar maktaduai 20 laa puh a nih chungchangah man turin thupek a tichhuak.

Alejandro Toleo hi kum 2001-2006 inkar khan Peru president a ni a, thuneihna a chan lai hian contract pek vangin Brazil construction firm, Odebrecht hnen aṭanga thamna sum tam tham tak dawnga puh a ni.

Toledo hi France ramah a zin mek nia sawi a ni a, February 4 khan Lima-a a chenna in chu prosecutor-ten an lo dap tawh bawk. Thamna laa puhna hi thu dik lo a nih thu a lo sawi tawh a ni.

Brazil construction firm, Odebrecht hi Latin America sorkar hrang hranga eirukna thlengah a inhnamhnawih fo nia puh a ni a, kum 2005-2014 inkar khan Peru sorkar hnenah contract a hmuh theih nan thamna, dollar maktaduai 29 a pek ngei thu pawh a sawi tawh. Heng hun hi Toledo bakah Alan Garcia leh Ollanta Humala-te president hun lai a ni a, anni pahnih pawh hian thil dik lo engmah an ti lo niin an sawi.

Prosecutor Hamilton Castro chuan Toledo-a a thubuaiah hian thiam loh a chan chuan kum 15 thleng lung-in tantir theih a nih tur thu a sawi.