Hungary-in an rama raltlante khuahkhirh a tum

Hungary chuan an rama raltlan lutte chu ramri bula camp a siamah dahkhawm a, an chetvel danah pawh khuahkhirhna siamsak a tum.

He ruahmanna siam thar hian Hungary rama raltlan awmsate pawh a huam dawn a, heng mite hi ramri-a camp siam­ah hian sawn vek tum an ni.

Prime Minister Viktor Orban-a kaihhruai sorkar chuan kum hnih liamta chhungin an ramah raltlan tam tak an lut a, hei vang hian an ram himna ngaihtuahin ruahmanna thar hi siam a ni tih a sawi. Orban-a chief of staff, Janos Lazar chuan an himna tur ngaihtuaha legal system siamṭhat a ngaih thu a sawi a, pem lut chungchanga buaina an neihah he ruahmanna hi hman a ni chauh dawn tih a sawi. Hungary sorkar chuan nikum March thla aṭang khan raltlan leh pem lut tam avangin buaina an tawk chho tawh tih a lo sawichhuak tawh a ni.

Lazar chuan ramri-ah hian raltlante awmna tur camp, mi 200-300 zel thleng awm theihna an siam dawn a, hetah hian an dilnate ngaihtuah a nih chhung chu an lo nghak dawn a ni, a ti. Camp-ah hian inbiakpawhna hmanruate pawh dah a ni dawn tih a sawi bawk.

Hungary sorkar hian ramri-ah military base pali a siam thar bawk a, heng hmunah hian sipai 3,000 vel awmin, anni hian ramri an veng a ni. Nikum October thla khan Hungary mipuite chuan EU-in member ramte hnenah raltlan 160,000 sem rual tura ruahmanna an siam chu an duh loh thu vote hmangin an lo tilang tawh a, hemi hnu hian raltlan an la lakluh belh lo a ni.