Macron-an France PM thar atan Elisabeth Borne a ruat

France president Emmanuel Macron chuan Thawhṭanni khan centrist politician, Elisabeth Borne-i chu an ram prime minister thar atan a ruat. An ram chanchina hmeichhe zingah PM ni thei pahnihna a ni.

Kum 61 mi, Elisabeth hi Macron-a kaihhruai sorkar hmasaah khan labor minister a ni. Thawhṭanni khan PM ni lai Jean Castex chu kum nga term vawi hnih a hman zawk tak avangain banna a thehlut a, a thlaktu atan Borne-i ruat nghal a ni.

PM thar atana ruat a nih hnua thu a sawiah Borne chuan, "Tuna ka dinhmun hian hmeichhe naupang te chu an suangtuahna um zui zel turin chona thar pe se ka ti hle a ni. Kan society-ah hmeichhiate'n dinhmun ṭha chang turin kan bei ve tur a ni," tiin an ram tana dinhmun pawimawh tak chelh tura thlan a ni chu lawmawm a tih thu a sawi.

Macron leh Borne-te hian hun rei loteah France sorkar thar an din beisei a ni. Hetih lai hian Macron-a'n PM atana Borne a ruat hi helh tawk an tam hle a, left-wing politician-ten an sawisel nghal. Borne hian tun hma lamin worker, union leh left-wing voter-te sawisel a lo tawk fo tawh a, kum 2020-a labor minister a chelh khan hna neilote hamṭhatna an dawn ṭhinte leh thla tina sum an dawn ṭhinte a lo tihtlem sak a ni. Kum 2018-a transport minister a nih lai khan, train network chu mimal kuta hlan bakah thawktu thar rawih belhte a ngheta rawih tawh lohna tur leh an damchhunga hamṭhatna an dawn ṭhin te chu tihtawp a tum avangin SNCF railway company aṭangin dodalna lian tak a tawk tawh bawk.

Borne hi Kum 1991-1992 chhunga Socialist president Francois Mitterrand hun laia hmeichhe PM, Edith Cresson dawta an ram hmeichhe zinga prime minister ni leh thei hmasa ber a ni. Cresson hi thil man sang leh hnathawh nei lo an pun chak em avangin sawisel a hlawh hle a, kum khat pawh office a chelh hman lo a ni.