Sri Lanka PM-in airline hralh a tum ; Hlawh pe turin pawisa tam zawk print dawn

Sri Lanka sorkar thar chuan an ramin an sum chân tawhte hmuhletnan national airline chu hralh an tum a, sorkar hnathawk hlawh la thei lote'n hlawh an lak theihna atan pawisa print turin a ti bawk.

Prime minister Ranil Wickremesinghe chuan Thawhṭannia TV kaltlanga ram mipuite hnena thuchah a sawiah, Sri Lankan Airlines chu privatize tum a nih thu a sawi. He airlines hian kum 2021, March thleng khan Rs tld 45 (USD mtd 124) a hloh tih a sawi. Hetianga sum tam tak a hloh avanga phurrit hi thlawhna pawh la chuang lo mipuiten an phurh ve zel a ngai lo, a ti.

PM chuan hnathawkte hlawh pek tur pawisa an print thu a sawi bawk. An ram chuan petrol chu ni khat tla chauh an nei tawh nia sawiin, sorkar chuan Sri Lanka tuipuia awm mek, lawnglian pathuma crude oil leh furnace oil-te lakluhna turin open market lamah theihtawp a chhuah mek tih a sawi.

"Tun hnai thla chho hi kan nuna hun harsa ber a ni dawn a ni. Kan harsatna chingfel turin political party zawng zawng telna national assembly emaw political body emaw kan siam vat a ngai a ni,' tiin Wickremesinghe chuan a sawi a ni.