Taliban-in Afghanistan-a Human Rights Commission titawp

Afghanistan-a rorellai, Taliban chuan US thlawp sorkar hmasa hnuaia department pawimawh tak tak panga a titawp. Heng zingah hian Human Rights Commission pawh telin, an ramin sum lama harsatna an tawh laia Human Rights Commission din chu ṭul loah an ngai niin official thuchhuah chuan a tarlang.

Afghanistan hian nikum August thlaa thuneihna an chan hnuah, Taliban sorkar hian a ṭum khatna atan kar liam ta Inrinni khan annual budget an pharh a, an sum indaih lohna tur hi Afghanis tluklehdingawn 44 (USD mtd 501) zet a tling.

Taliban sorkara deputy spokesman Innamullah Samangani chuan department an ṭhiah takte hi thil ṭul tawh lo nia an ngaih thu leh, budget-ah pawh telh an nih loh thu a sawi. Department an tihtawp zingah hian an ram danpui kalpui dan a nih chungchang enzuitu, thuneihna sang tak nei High Council for National Reconciliation (HCNR) pawh a tel. HCNR hi Afghanistan president hlui Abdullah Abdullah khan a ho ṭhin a, US thlawp President hlui Ashraf Ghani kaihhruai sorkar leh Taliban-ten inremna an siam theihna atan pawh hma a lo la tawh a ni.