NKorea-in ballistic missile enchhin
North Korea chuan nimin khan Korean peninsula khawthlang lam, North Pyongan province-ah ballistic missile a enchhin leh.
Ballistic missile hi an ram huna zing lam dar 7.55-ah, Norty Pyongan province-a Banghyon air base aṭangin Sea of Japan lamah kahchhuah a ni. Missile hi Rodong medium-range nia hriat a ni a, km 550-a thui a thlawh hnuah tuipuiah a tla niin, South Korea defene minsitry thupuangtu chuan a sawi.
South Korea defence ministry chuan thuchhuah siam nghalin, NKorea-in missile a enchhin leh chu khawvel ram dangte laka nuclear leh missile a neihzia lantir a tumna niin a sawi a, hei bakah US President thar Donald Trump-a’n a vauna a chhan letna kawng khat nia ngaih a ni bawk.
UN resolution hnuaiah NKorea hian ballitsic missile technology lam reng reng a hman khapsak a ni. Mahse khap a ni chung hian NKorea hian nikum chhung pawh khan ṭum engemaw zat a lo enchhin tawh a, US ram laili kap pha thei tur nuclear ralthuam a siam tih pawh a sawi a ni.
Japan Chief Cabinet Secretary Yoshihide Suga chuan nimina NKorea missile kahchhuah hian Japan tuipui a thleng lo niin a sawi a, mahse an lungawi loh thu hi NKorea sorkar hriattir ngei an tum tih a sawi.
Kar kaltaa US Defence Secretary James Mattis-a’n South Korea a tlawh ṭum khan, NKorea-in a ṭhenawm ramte himna tiderthawng zawnga nuclear ralthuam a hmang a nih chuan na taka chhan let a nih tur thu a lo sawi tawh bawk.