Bomb hmuh vangin Thessaloniki khuaa chengte sawnchhuak

Greece rama Thessaloniki khuaa cheng, mi 70,000 chuang chu, Indopui II hunlaia mi bomb tam tham tak hmuchhuah a nih avangin an khua aṭangin sawnchhuah lailawk an ni.

Kar kalta khan khawpui hmarlama kawng siamnaah bomb, kg 250 dawn hmuh­chhuah a ni. Heng bomb-te hi tihpuah tum a ni a, hei vang hian bomb hmuhna aṭanga km 1.9 bial chhunga chengte chu Inrinni aṭang khan sawn­chhuah ṭan an ni.

Inrinni khan mahnia kal thei lo leh damlo mi 300 chuang chu ambulance 20 hmangin hruai chhuah an ni a, nimin zing khan midang pawh thiar chhuah chhunzawm an ni.

Thuneitute chuan bomb an hmuhchhuahte tihpuah nan hian darkar riat vel zet hun a ngai dawn niin an sawi. Sipai thupuangtu Colonel Nikos Phanios chuan bomb hi a dang a awm leh awm loh pawh zawn chhunzawm a nih tur thu sawiin, ni hnih chhung hun an hman pawh a ngai maithei niin a sawi.

Indopui II tawp aṭanga kum tam tak hnuah pawh indo laia mi, bomb la puak lo hmuhchhuah a la awm fo. Kumin January 23 khan Hongkong University bul­ah bomb hmuhchhuah a nih avangin a chhehvela awmte chu sawnchhuah an lo ni tawh a ni. Hemi hma hian Britain Navy-te chuan Indopui II hunlaia bomb nia hriat chu London-a Parliament bulah an lo hmu tawh bawk. Nikum December 25 khan Germany-a Augsburg khuaah Indopui hun laia Britain bomb thlak puak lo hmuhchhuah a nih avangin khawchhunga chengte chu hmun dangah insaseng tir an lo ni tawh bawk a ni.