Mexico-ah Trump-a policy duh lohna lantir

US President Donald Trump-a immigration policy leh Mexico ramri hung a tumna duh loin Mexico ramah kawngzawh huaihawt a ni.

Pathianni khan kawngzawh hi Mexico ram khawpui hrang hrangah huaihawt a ni. Kawngzawhnaa telte chu thawmhnaw vara inthuamin Mexico flag an keng a, Trump-a duh lohna thuziakte an keng tel bawk.

Kawngzawh huaihawttute chuan, Mexico mipuite chuan Trump-a policy an duh loh zia lungrual takin an lantir a ni, an ti. Mexico President Enrique Pena Nieto pawh an rama eirukna leh tharum thawhna thlengte tirem thei loah puhin an sawisel bawk.

Nawrh huaihawtnaa telte chuan US President Trump-a’n US-a pem luh tumte khapna siam a tum chu khawvel pum tan thil ṭha lo tak a ni tih an sawi. America ram ngei pawh pem lutten an din a ni tih theihnghilh lo tura an duh thu an sawi bawk.

Donald Trump hian Muslim tamna ram pasarih aṭanga US-a luh khapna thupek a lo siam tawh a, mahse he thupek hi US court chuan a tihtawp lailawk sak a ni. Hei bakah hian campaign laia a lo tiam tawh angin US leh Mexico ramri pawh a hungna bang siam ngei a tum thu a sawi leh bawk. Ramri hungna bang siam tum hian Mexico mipuite a tithinur hle a, Mexico President Nieto pawhin sawiselin US-a zin a tum pawh a ṭhulh phah a, Trump-a’n bang hungna senso Mexico tum tir a tum chungchangah pawh, an tum dawn lo tih a lo sawi tawh a ni.