Thu dik lo thehdarh vangin journalist paruk man

Ivory Coast-a journalist paruk te chu, thuneitute lakah sipaite an hel nia sawia thu dik tawk lo thehdarhah puhin man an ni.

Ivory Coast-ah hian tun hnai khan sipaite chu an hlawh chungchangah lungawi loin an nuar a, Adiake khuaa army barrack aṭangin van lam hawiin silai an hmetpuak a ni. Mahse he thil thleng chungchang hi journalist

ṭhenkhat chuan sipai helna chhuak niin an chanchinbu-ah an thehdarh a, sipaite fuihpawrh an tum niin public prosecutor chuan a sawi.

L’Inter leh SoirInfo chanchinbu editor leh a neitute chu man an ni tawh a, an ram khawpui Abidjan-a police camp-ah hren mek an ni a. Eptu pawl chanchinbu Le Temps leh Notre Voie editor leh a neitute pawh man an ni bawk. Journalist mante hi thu zawh fiah an ni dawn a, thu dik tawk lo an thehdarh chu khawi aṭanga an hriat nge tih zawtin, a mawhphurtu dik tak zawnchhuah a ni dawn a ni tih prosecutor chuan a sawi.