NKorea-in missile enchhin a hlawhtlin thu a sawi UNSC-in emergency meeting a nei

North Korea chuan Pa­thianni-a ballistic missile an enchhin chu a hlawhtling tih a sawi a, an missile enchhin chu “surface-to-surface medium-to-long-range ballistic missile” Pukguksong-2 missile a nih thu a sawi nghal bawk.

United Nations resolution-in NKorea hi ballistic missile leh nuclear technology hman a khapsak a, mahse khapsak a ni chung hian nikum chhung pawh khan ṭum eng emaw zat missile hi a lo enchhin tawh a ni. Pathianni-a ballistic missile a kahchhuah leh avang hian ram hrang hrangten NKorea an dem thu an sawi a, US, Japan leh South Korea chuan United Nations Security Council chu NKorea chungchang ngaihtuaha urgent meeting ko nghal turin an ngen a, nimin khan UNSC meeting hi neih a ni.

NKorea state news agency, KCNA chuan missile an enchhin hi a chi thar, nuclear ralthuam pawh phur thei a nih thu sawiin, kahchhuah a nih lai hi an ram hotu lu ber Kim Jong-un pawhin a enpui niin a sawi. Missile chu hlawhtling taka enchhin a nih thu a sawi bawk.

South Korea leh US official-te chuan Pahtiannia missile enchhin hi Japan tuipui lamah kahchhuah a nih thu sawiin, km 500 vel a thlawh hnuah tuipuiah a tla niin an sawi.