US security adviser Michael Flynn a bang

US Security Adviser Michael Flynn chu President Donald Trump-a lakluh a nih hmaa Russia official a biak chungchang avangin a bang.

Michael Flynn hian Justice Department-in hetianga Russia official a lo biak pawh hian President Trump-a kaihhruai sorkar chu dinhmun khirh takah a dintir thei tih a sawi avangin, Thawhlehni khan banna a thehlut a ni.

Banna lehkha a thehluha hian Flynn chuan President hlui leh thar inthlak dawn lai vel khan US-a Russia ambassador nen telephone-in ṭum eng emaw zat an inbia tih a sawi. Mahse an inbiak chungchang hi vice president elect Mike Pence leh midangte hnenah kimchang lo takin a hrilh niin a sawi. Thil awmdan kimchang a hrilh loh avangin vice president chuan security adviser hian Russia hrek chungchang engmah a sawipui lo niin a sawi a, mahse Flynn chuan heng thute hian a sawipui niin a sawi leh a ni.

Flynn chuan President Trump-a hnuaia a thawk thei chu lawmawm a tih thu a sawi a, khawvel puma America ram din thar lehna turin president chuan kar thum chhung lekin American foreign policy pawh a siam thar leh niin a sawi.

White House National Security Council-a chief of staff, General (rtd) Keith Kellog chu Flynn aiawh lailawk tur hian ruat nghal a ni. Security Adviser thar tur hi President Trump chuan a ngaihtuah ang.

US President thlan dawna campaign lai pawhin Flynna hi Trump-a thlawptu nghet tak a ni a, mahse Russia inzawmna a neihpui danah party hruaitu hlunte an lung a awi vak lo thung.