US-in Venezuela vice president hrekna siam

US sorkar chuan Venezuela vice president thar, Tareck el-Aissami chu ruihhlo tawlhrukna lama inhnamhnawihah puhin a hrekna tur a siam.

Tareck el-Aissami hi January thla khan President Nicolas Maduro-a’n vice president atan a ruat thar a ni.

US chuan Tareck el-Aissami hi international drug trafficking lama inhnamhnawihna a neih avangin sanction list-ah telh a nih thu a sawi a, a ni bakah hian sumdawng hausa Samark Bello pawh Aissami-a nena thawkduna puhin list-ah a telh bawk. US-in sanction list-a a telh thar chungchang hi Bello hian a la chhang lo a, mahse Aissami chuan thil sual tihnaah inhnamhnawihna a neih loh thu a sawi.

Sanction list-ah telh a nih avangin Venezuela vice president hian US-a a thil neihte a khawih che thei dawn lo a, a zin luh khap a ni bawk ang.

US Treasury chuan thuchhuah siamin, Aissami hi thlawhtheihna leh lawnglian hmanga ruihhlo thawn chhuah kawngah a inrawlh a, thiamloh chantir vanga tang mek Venezuela drug lord Walid Makled pawh humhim tumah a puh bawk. Aissam hi Hezbollah helpawl nena inzawmna neiah puhin US chuan a chhui chiang mek bawk a ni.