Hamas hruaitu thar tur thlang

Palestinian pawl, Hamas chuan Gaza Strip-a an hruaitu thar atan Israel jail-a kum 20 chuang lo tang tawh, Yehya al-Sinwar chu an thlang.

Yehya al-Sinwar hi kum 1961 khan Khan Younis-a refugee camp-ah a piang a, Hamas pawl innghahna pawimawh tak pakhat a ni. Kum 2011 October khan Israel leh Palestinian-te’n tang an inthleng ṭumin chhuah a ni.

Hamas pawl hotu lu ber, Khaled Meshaal chu ram dangah inhumhimna zawnga a awm avangin Gaza-a Hamas inawp dan leh kalphungah Sinwar hi a pawimawh dawn hle. Israel laka an pawl policy siam turah pawh thuneitu pawimawh tak a ni chho dawn a ni.

Israel chuan kum 1980 chho khan Israel nena inzawmna neia puh, Palestinian mite thah an nih chungchangah Sinwar hi mawhphurtuah puhin damchhung tang turin a hrem a ni. Kum 23 zet Israel jail-ah hian a tang hman. Mahse kum 2011 khan Israel chuan Palestinian kuta tang, Israel sipai Gilad Shalit thlengna atan Palestinian mi tang 1,047 a chhuah a, an zing­ah hian Sinwar pawh hi a tel a ni.

Sinwar hian Palesti­nian pawl dang, Fatah nena sorkar inṭawm siam pawh a remti a, mahse hemi atana an inbiakna chu a hlawhtling thei lo a ni.