Kim Jong Un-a'n hri leng darh chhanah official-te puh

North Korea hotu Kim Jong Un chuan an ramin Covid-19 an hmachhawn dan chungchangah a lawm loh thu a lo sawi tawh a, rampumah Covid-19 natna lanchhuah dan chi khat, khawsik nei ṭhahnem tak an awm chhoh zel avangin sorkar official-te chu an hna thawk ṭha tawk lo tiin hri leng an lo hmachhawn danah a lawm lo hle.

NKorea-ah hian khawsik nei mi 2,32,880 report an dawn belh leh a, mahse an zingah hian Covid-19 kai eng zat chiah nge awm tih erawh an tarlang lo. Thihpui hi mi paruk an awm belh leh bawk.

Thawhlehnia Workers Party ten politburo meeting an neihah Kim chuan "Hri leng kan hmachhawn laia state chhunga mawhphurtute'n an hna an tlin tawk loh avangin buaina hi a nasat phah a, hei vang hian harsatna tam zawk kan hmachhawn a ngaih phah a ni," tia a sawi thu state media, KCNA chuan a tarlang.

An ramah Covid-19 hri a leng tih an puan hnuah, NKorea-ah hian khawsik nei mi maktaduai 1.72 chuang report an dawng tawh a, Thawhlehni tlai thleng khan mi 62 an thi tawh a ni. An ramin vaccine leh medical infrastructure an neih ṭhat tawk loh avangin health official-te chuan Covid-19 damdawi pek sual leh overdose vanga thi report awm ṭhin tihrehna atan damdawi pek dan chungchanga inkaihhruaina, treatment guide an duang tih KCNA chuan a sawi bawk. Kaihhruaina dan an tihchhuahah an hriselna dinhmun a zir zelin damlote hian enkawlna hran ṭheuh an dawng dawn tih tarlan a ni a, mahse treatment plan-ah hian eng damdawi nge hman a nih dawn an sawilang lo.