Mariupol steel plant-a Ukraine sipaite inpe : Russia

Russia chuan Thawhlehni khan Ukraine lawng chawlhna hmun, Mariupol khawpuia Azovstal steel plant-a Ukraine sipai 265-te chu an kutah an inpe tih sawiin, an zingah hian hliam tuar pawh eng emaw zat an tel tih a sawi.

"Darkar 24 liam ta chhung khan, sipai 265-te chuan an ralthuamte dahthlain an tlawm thu an sawi a, heng zingah hian hliam na tak tuar mi 51 pawh an tel a ni," tiin Russia defence ministry chuan a tarlang. Ministry chuan enkawl ngaite chu Novoazovsk khuaa damdawi-inah an dah luh thu a sawi bawk.

Russia president Vladimir Putin chuan Ukraine sipai an mante hi international law zulzuia enkawl a tiam tih Kremlin thupuangtu Dmitry Peskov chuan a sawi.

Ukraine defence ministry pawhin Thawhṭanni zankhan Ukraine fighter 264-te chu Russia thuneihna hnuaia territory-ah sawnchhuah an nih thu a puang. Ukraine deputy defence minister Ganna Malyar chuan an sipaite hi an hruai kir theihna turin Russia nena tang inthlengna tur kalpui tura hma an lak tur thu a sawi.

Russia hian thla hmasa khan Mariupol hi an thununna hnuaiah a awm tih a lo sawi tawh a, mahse Ukraine sipai ṭhahnem takte chu Russia sipaiten an dan chah, Azovstal industrial zone leihnuai hmunah inkulhin an theih angin an lo dang let a ni.