Britain PM-in Trump zin lo tura ngenna a hnawl

Britain Prime Minister Theresa May chuan US President Donald Trump-a’n an ram a tlawh tur remti lo tura ngenna chu a hnawlsak.

US President Trump-a immigration policy duh loin, Britain ram mipui tam tak chuan an rama a zin pawh phalsak lo turin an ngen. PM May-i hnena petition an thehluhah hian mi maktaduai hnih dawnin hming an sign a ni.

Petititon thehluttute chuan Trump-a’n an ram a tlawh chuan sorkarin a puala zanriah a buatsaih te a ngai dawn a, hei hi an ram lalnu Queen Elizabeth tan thil zahthlak tak a ni dawn a ni, an ti.

PM May-i chuan petition thehluttute chu chhangin, sorkar chuan an duhdante chu a hriatthiampui a, mahse an ngaihdan erawh chu a ṭawm vek kher lo tih a sawi. Trump chu ram khat hruaitu a nih avangin an ram tlawh a duh a nih chuan an remti ngei ang tih sawiin, a zin theih hun tur pawh a tihfel theih thuai an beisei thu a sawi. Petition thlawptu MP-te pawhin an duhdan chu sorkarin a pawmsak kher tur a ni lo tih an hriatthiam thu an sawi.

Petition thehluhah hian signature maktaduai khat chuang an lakkhawm theih chuan House of Commons-ah sawiho tur a ni a, he petition pawh hi February 20-a sawiho tura tih a ni.

US President atana Donald Trump lakluh a nih hnu January27 khan May-i hian US tlawhin meeting a neihpui a ni. Meeting-ah hian Britain prime minister chuan Queen aiawhin Trum hi an rama zin turin a sawm a, a sawmna hi Trump pawhin a pawm a ni.

Trump-a dodaltu langsar, House of Commons Speaker John Bercow chuan Trump-a hian an ram a tlawh a nih pawhin Parliament-ah thu sawi tir tur a ni lo tiin a lo sawi tawh bawk. A thusawi hian sawizui a hlawh hle a, House-ah amah rintawk lohna motion pawh putluh a nih phah a, hei hian Speaker a nihna dinhmun pawh a tihderthawn phah nia sawi a ni.