Iraq sipaiten Mosul-ah beihpui thlak chhunzawm zel

Iraq sipaite chuan Islamic State (IS) firfiakte kut aṭanga an ram khawpui pawimawh, Mosul khua lak let tumin beihpui an thlak chhunzawm zel.

Sipaite chuan firfiakte kuta la awm mek, Mosul khawpui khawthlang lam bial chu lak tumin thapui an thawh leh tih an sawi a, heng hmunte hi chhim leh khawthlang lam aṭangin an bei leh a ni.

Iraq Army 9th Division-a deputy commander, Brig Walid Khalifa chuan ni hnih kalta chhung khan sipaite hian hma an sawn chhoh thu a sawi. Sipaite hian thla tum chhung beihpui an thlak hnuah, January thla khan Mosul khawchhak lam bial chu firfiakte kut aṭangin an la fel tawh tih an sawi.