Israel-Palestinian chungchanga US ngaihdan thlak

US President Donald Trump chuan Israel leh Palestinian inkar buaina chinfelna tura Israel leh Palestinian ram hran din a ngai nia US in ngaihdan nghet tak a lo neih tawh chu thlakin, hei hi buaina chinfelna kawng awmchhun a ni lo, a ti.

US tlawha zin mek, Israel Prime Minister Benjami Netanyahu leh President Trump-te hian Nilaini khan joint conference an nei a, he hunah hian Israel leh Palestinian lamin an remti dun thei a nih chuan ram pahnih din kher chu a thlawp lo tih a sawi. Hemi rual hian ram pahnih din chungchang chu an remti dun a nih chuan ṭha a tih thu a sawi tel bawk.

Ram pahnihah ṭhen an nih loh chuan Palestinian leh Israel chu democratic state pakhat hnuaiah a awm dawn a, hei hi Israel PM Netanyahu leh a kaihhruai ṭangrual ram chuan rem an ti lo a, hemi rual hian Palestinian ram hran din pawh an remti lo bawk a ni.

Palestinian lam chuan democracy ram pakhat emaw, ram pahnih emaw din pawh an remti thei a, mahse ram pakhat hnuaia awm a, inthliar hranna policy kalpui erawh an remti lo thung.

Hetihlai hian UN Secretary General Antonoi Guterres chuan Israel leh Palestinian buaina chinfelna kawng awm­chhun chu ram pahnih din chauh chu a ni tih a sawi a, hei hi khawvel ram tam zawkin an pawmpui bawk. Israel leh Palestinian ram din a nih theih nana tihtur ngaite chu theih­tawp chhuaha an tih an ngai niin Guterres chuan a sawi.