Venezuala-in CNN tihtawptir

Venezuela thuneitute chuan US broadcaster CNN-in an rama Spanish ṭawnga channel a tihchhuah chu thu dik tawk lo puangah puhin tichhuak tawh lo turin a hriattir.

Venezuela National Telecommunications Commission (Conatel) chuan, CNN Spanish channel hi Iraq-a Venezuela embassy-a passport pekchhuah dan chu a dik tawk lo nia a puan avangin titawp nghal turin a hriattir a, TV channel thupuan dan chu Venezuela ram boruak muanawm tak tihchhiat tumna a ni, a ti.

CNN network hian Iraq rama Venezuela embassy chuan Venezuela passport leh visa-te chu Iraq mite hnenah a hralh ṭhin niin a sawi a, hemi chungchung hi kum khat zet chhui a ni tih a sawi bawk. Dik lo taka passport pekchhuah danah hian Venezuela vice president Tareck El Aissami pawh inrawlhah puh a ni a, passport an pekchhuah zingah hian Lebanon firfiak pawl Hezbollah member pawh eng emaw zat an tel a ni.

Venezuela sorkar hian US-in ruihhlo tawlhruknaa inhnamhnawiha puha an ram vice president Aissami a hrek chungchangah, an rama US palai chu koin, a lungawi loh thu a hriattir. Venezuela Foreign Affairs Minister Delcy Rodriguez chuan, President Nicolas Maduro-a’n a hriattir angin, US sorkar hnenah an lungawi loh thu hi ziakin an thlen tih a sawi a, vice president Aissami an zahna lantir turin an ngen tih a sawi. President Maduro pawhin Aissami thlavang hi hauhin, kum 2008-2012 chhunga interior minister a nih lai pawhin Assami hian Venezuela rama ruihhlo tawlhru ṭhin pawl liante lakah nasa takin beihpui a thlak a ni, a ti.