Sri Lanka sorkarin petrol leina tur sum nei tawh lo ; Mipuite fuel la tura intlar tawh lo turin a ngen
Sum harsatna vanga talbuai mek Sri Lanka chuan Nilain khan petrol leina tur, foreign exchange a nei tawh loh thu sawiin, mipuite chu fuel la tura intlar tawh lo turin a ngen.
Sri Lanka tuipuiah hian thla hnih dawn chu petrol phur lawnglian a ding tawh a, mahse lawng company-te hian sum an pek phawt loh chuan an fuel phurh hi an pechhuak duh lo a ni.
Waters, power and energy minister Kanchana Wijesekera chuan Nilaini khan Parliament-ah petrol leina tur hi US dollar pek tur an nei tawh lo tih sawiin, kumin January 2022-a lawnglianin petrol a rawn phurh luhna man, USD mtd 53 pek ngai pawh an la nei tih a sawi. Hemi rual hian diesel erawh stock an la ngah tawk niin a sawi thung.
Wijesekera chuan Central Bank-in petrol man an bat hmasakna hi pek a tiam hnuah, company lam pawhin an petrol phurh chu pek chhuah an remti tawh tih a sawi. Mahse an pawisa ba pekna tur hi an la ngaihtuah mek thu a sawi nghal bawk. "Hei vang hi ania mipuite chu fuel la tura intlar lo tura kan tihna chhan. Diesel lamah chuan buaina kan nei lo. Mahse, petrol lak tum chuan lo intlar suh u. Mitin daih khawp petrol stock kan nei lo a, nitin khawsak mamawh phur lirthei tan rualkhai takin semchhuah kan tum a, ambulance-te pawh ngaih pawimawh an ni," tiin minister chuan a sawi. Lawngliana petrol-te chu an pekchhuah hunah pawh filling station hrang hrangte sem darhna atan hun an mamawh dawn a, vawiin aṭanga ni thum chhung vel hun an hman a ngai dawn tih a sawi.
Minister chuan diesel ṭhahnem tak an dawn thu sawi zuiin, "Thawhlehni khan ramchhunga filling station zawng zawngte tan super diesel leh auto diesel kan semchhuak a ni. Vawiin aṭang chuan ramchhunga filling station awm 1,300 aṭangin filling station thawk ṭha zual 1190 hnenah chhum lo chat loin thawnchhuah theih kan beisei tawh a ni," tiin House hmaah a sawi.
June 2022 thleng atan Sri Lanka hian fuel lakluhnan USD 530 an mamawh tih minister chuan sawiin, an ram hian Indian Credit Line hmangin hamṭhatna pawh lo dawng mahse, fuel leina atan thla tin USD mtd 500 an mamawh a ni.