NKorea-in Covid do nan damdawi leh medical supply chak zawkin siam

North Korea chuan an rama coronavirus hri chak taka a darh avangin damdawi leh medical supply, a bikin steriliser leh thermometer chak zawka siamchhuah hna an kalpui mek tih state media KCNA chuan nimin khan a sawi.

Ram puma lockdown an kalpui mek karah, khawsik leh natna ti nep thei, Korean damdawi pawh nasa zawka siamchhuah anih thu sawiin, "natna khirh zawk laka min veng theitu leh min tidam theitu a ni," tiin KCNA chuan a tarlang.

Kar hmasa khan an rama Covid hri a len thu NKorea hian a puang chauh a, hri leng vang hian medical resource leh vaccine indaih lohna vangin an dinhmun a ngaihtuahawm nghal hle a, UN human rights agency chuan mipui maktaduai 25 tan chhiatna nasa tak a thlen theih thu an sawi a ni.

Hri leng hi April 25-a an khawpui Pyongyang-a military parade an hman ṭangin a rawn darh ṭan a, May thla tawp leh June thla tir hian a peak a thlen rin a nih thu South Korea-a Newsis news agency chuan a sawi.

KCNA hian chhan hriat loha khawsik natna neite chu April thla tawp aṭanga hmuhchhuah an nih thu a sawi. Mi 2,62,270-te chuan khawsik natna an nei a, Nilaini tlai khan mi pakhat chu a thih belh leh tih state emergency epidemic prevention headquarters data chuan a tarlang. Mi engzatin in nge he hri hi kai tih an tarlang lo thung.

NKorea-ah hian nimin thleng khan Covid hri kai lanchhuah dan chi khat khawsik nei mi 1,978,230 leh thihpui 63 an awm tawh a, hri laka invenna tur kaihhruaina khauh tak an kengkawh nghal bawk.

Factory-te chuan injection, damdawi, thermometer leh medical supply te chu an khawpui Pyongyang leh region hnaihah chak zawka siamchhuah hna an thawh mek thu KCNA chuan a sawi. Chi(salt) ton sang tel chu Pyongyang khawpuiah antiseptic solution siamna turin thawnluh a ni.

National vaccination campaign leh Covid enkawlna a awm loh avangin, state media chuan damlo te chu nachhawkna leh antibiotics bakah, tui lum chi al hmanga kam ṭhuah emaw lonicera japonica thingpui emaw willow leaf thingpui emaw in ṭhin turin thurawn a pe. Kim-a'n kar liamtaa pharmacy a tlawh ṭuma a tihdan angin mipuite chu pawn an chhuah dawnin mask pahnih hman thuah turin thurawn a pe bawk.