Mariupol-a Ukraine fighter inpek belh leh : Russia

Russia chuan Nilaini khan Ukraine fighter dang 694-te chu an kutah an inpek belh leh a, an kuta inpe hi mi 956 an tling tawh tih a sawi.

Russia defence ministry chuan Azovstal steel plant-a Ukraine fighter inpe zinga hliamte damdawi-ina enkawlna dawng tura an kal lai video pawh a tilang a ni. Ukraine chuan Thawhlehni khan fighter 250 chuangte chu an inpek thu an sawi a, mahse plant chhunga awm zat hi a tarlang lo thung.

Mariupol hi Russia-in Ukraine khawpui an laksak zinga khawpui lian ber leh February 24-a inbeihna an kalpui hnua Russia president Vladimir Putin-a'n hnehna an channa hmun tia a lo puan tawhna a ni.

Azovstal fighter-te chung thu hi engtin nge an rel dawn tih hriat a la ni lo a, Ukraine chuan tang inthleng, prisoner swap nei turin an dil a, mahse Russia mipui ṭhenkhat chuan hremna hmachhawn ngei se an tithung. Russia defence ministry chuan fighter-te hi Russia territory chhungah hruai an nih thu a sawi.

Ukraine chuan fighter-te hi Russian prisoners of war te nen inthleng turin inbiakna an kalpui mek thu an sawi a, mah se Russia chuan an rawtna hi an tihlawhtling dawn tih chiang takin an la sawi lo a ni.